قصيدة ( قوم الدنيا وهو جالس على كرسيه ) إهداء لمعالي المستشار ( سعود القحطاني ) من كلمات فهد المكودر

نحمد اللي يكتب الحسنه ويمحوا السيئه .. عاد عيد الهاجس اللي طال وقت صيامه

ما يقند راسي الا الدله البريه .. وما يوسع صدري الا هاجسي والهامه

والقصيد اللي يجي فسعود ناره حيه .. رفرفت فوق الجبال الشامخات اعلامه

المهابه والفخر والوجه والجاهيه .. من نشد عنها يشوف الضيغمي قدامه

ان فزع ما عاد لظروف الزمن ماريه .. وان حضر بين الاكابر جاك شامخ هامه

اكرم من الوابل اللي منزنته وسميه .. اصدق من اللي دعا الله يوم لبس احرامه

اذكر اسمه للرجال وحاجتك مقضيه .. وانص ديوانه لا طاحت بالشجاع عظامه

وفي ولا الحكام سطر سيرة ذاتيه .. يشهد لها المسلم اللي يفتخر باسلامه

في فراغه حط في جبهة عدوه كيه .. وفي دوامه حط الاعداء ف شبه دوامه

قوم الدنيا وهو جالس على كرسيه .. كيف عاد اليا نفذ كمه وشد حزامه

حي والله من كشف نية خبيث النية .. الشيم ما تمنع اللي كل وجهه شامه

من يبيع عمامته للفرس لابو حيه .. لا يقابلنا وراسه ما عليه عمامه

اشهد ان سعود وقفاته ما هي عاديه .. جعل من سبه من العدوان تحت اقدامه

اي افاخر به ولا من مرني طاريه .. قلت جعل ايام عمري تنحسب لأيامه

رجل دولة وابن عم جيرته معنيه .. والفخر في مدح ابو خالد لبست وسامه

الثنا يثنى على اهل العزوه المسميه .. سيرة الوهابه تقود الفخر بخطامه

من تعزوى بالضياغم محتمين الهيه .. والله ان يعيش طول العمر ماحد ضامه

والولاء لملوكنا ما ناخذه عاريه .. دونه الارواح نجلبها على السوامه

علموا عدونا لابد له من جيه .. وان ذبحه الخوف منا لعنبوا من لامه

في ذرى سلمان كل بلادنا محميه .. سيدي حامي حما جاره وعوق اخصامه

فاتح المصمك سلايل باني الدرعيه .. وصاحب الرؤية على نهجه تسير اقدامه

نغلي محمد غلا ماهوب يوجد زيه .. يكفي ان ابن الوطن حقق جميع احلامه

ويكفي ان اعداه بانحاء الكورة الارضية .. استعد لهم وطوعهم برأس ابهامه

والله ان نفوسنا به راضيه مرضيه .. من صغير عيالنا للمفتي العلامه

سعود القحطاني